రైతులు తమ పంటకు తామే ధర నిర్ణయించే స్థాయికి ఎదగాలి: కలెక్టర్

నంద్యాల ( న్యూస్ వెలుగు): రైతులు ప్రకృతి వ్యవసాయాన్ని అవలంబించి తమ పంటకు తామే ధర నిర్ణయించే స్థాయికి ఎదగాలని జిల్లా కలెక్టర్ జి. రాజకుమారి పిలుపునిచ్చారు. మంగళవారం నంద్యాల పట్టణంలోని క్రాంతి నగర్ లో డి.పి.యం.యు ఆధ్వర్యంలో జరుగుతున్న టీ–ఐసీఆర్‌పీ ఐదు రోజుల పాటు నిర్వహిస్తున్న శిక్షణ కార్యక్రమానికి కలెక్టర్ ముఖ్యఅతిథిగా హాజరయ్యారు.

ఈ సందర్భంగా జిల్లా కలెక్టర్ జి. రాజకుమారి మాట్లాడుతూ రైతులు ప్రకృతి వ్యవసాయాన్ని అవలంబించి తమ పంటకు తామే ధర నిర్ణయించే స్థాయికి ఎదగాలని, మార్కెటింగ్ నైపుణ్యాలను అభివృద్ధి చేసుకోవాలని పిలుపునిచ్చారు. జిల్లాలో ఒక లక్ష ఎకరాల్లో ప్రకృతి వ్యవసాయం విస్తరింపజేయాలనే లక్ష్యంతో ప్రభుత్వం, వ్యవసాయ శాఖలు సమన్వయంతో ముందుకు సాగుతున్నాయని కలెక్టర్ తెలిపారు. ప్రస్తుతం 50 వేల మంది రైతులు మాత్రమే పాక్షికంగా ప్రకృతి వ్యవసాయ పద్ధతులు అవలంబిస్తుండగా, పూర్తిగా ప్రకృతి వ్యవసాయం చేస్తున్న రైతులు 6,000 మంది ఉన్నారని వివరించారు. ప్రకృతి వ్యవసాయం విస్తరణలో మహిళా సంఘాల పాత్ర అత్యంత కీలకం అని కలెక్టర్ పేర్కొన్నారు. వారు గ్రామ స్థాయిలో రైతులను ప్రేరేపిస్తూ, సహకార వ్యవస్థల ద్వారా పద్ధతుల అమలులో ముందుండాలని సూచించారు. ఇంటి వద్ద కిచెన్ గార్డెన్లు, అంగన్వాడీ సెంటర్లు మరియు పాఠశాలల్లో పెరటి తోటలు ఏర్పాటు చేసి, భావితరాల ఆరోగ్యాన్ని మెరుగుపరచాలని టి–ఐసీఆర్‌పీలకు కలెక్టర్ సూచించారు.

ప్రతి టి–ఐసీఆర్‌పీ ఒక ఆదర్శ రైతుగా ఎదిగి, ఇతరులను ప్రకృతి వ్యవసాయం వైపు మార్చేలా ప్రేరేపించాలన్నారు. పురుగు తెగుళ్ల నివారణకు రసాయనాల బదులు కషాయాలు వాడాలని, యూరియా–డిఏపీ వాడకాన్ని తగ్గించాలని సూచించారు. అలాగే, గట్లపై చెట్లను నాటి పర్యావరణ సమతౌల్యం కాపాడాలని పేర్కొన్నారు. మొక్కలకు అవసరమైన పోషకాలు సమతుల్యంగా అందించాలని, 365 రోజుల పాటు పంట వైద్యాన్ని పాటించడం ద్వారా భూసారం పెంచవచ్చని కలెక్టర్ సూచించారు. ప్రకృతి వ్యవసాయం ప్రతి ఒక్కరి చేత సాధ్యమేనన్నారు. అందరూ నైపుణ్యం కలిగిన రిసోర్స్ పర్సన్‌లుగా ఎదిగి, ఏపిసియన్ఫ్ ప్రాజెక్టు లక్ష్యాలను నెరవేర్చాలని, రైతు బలంగా ఉంటే దేశం బలంగా ఉంటుందని కలెక్టర్ స్పష్టం చేశారు. ఈ కార్యక్రమంలో జిల్లా వ్యవసాయ అధికారి ఎం.సి. మద్దిలేటి, డిపిఎం శ్రీనివాసులు, ఏడిపిఎం అబ్దుల్ సలాం, జిల్లా ఎన్‌ఎఫ్‌ఏలు, డి.టి.టిలు, టీ–ఐసీఆర్‌పీలు పాల్గొన్నారు.