ముంబై ఉగ్రవాద దాడి నిందితుడుని కఠినంగా శిక్షించాలి ..!

అంతర్జాతీయం న్యూస్ వెలుగు :  26/11 ముంబై ఉగ్రవాద దాడి నిందితుడు తహవ్వూర్ రాణాను గు ; గురువారం భారతదేశానికి తీసుకువస్తున్నారు. ఈ విషయాన్ని కేంద్ర మంత్రి పియూష్ గోయల్ సోషల్ మీడియా పోస్ట్‌లో తెలిపారు.  ముంబై దాడుల నిందితుడిని  గురువారం భారతదేశానికి తీసుకువస్తున్నామని, అతనికి కఠినమైన శిక్ష పడుతుందని ఆయన అన్నారు. ముంబైలో మీడియాతో మాట్లాడుతూ, ఉగ్రవాదులను శిక్షించడానికి కాంగ్రెస్ ప్రభుత్వం ఏమీ చేయలేదని ఆయన ఆరోపించారు.

అమెరికా నుంచి ప్రత్యేక విమానంలో అతన్ని తీసుకువస్తున్నట్లు వెల్లడించారు.   NIA ప్రధాన కార్యాలయం, పాటియాలా కోర్టు మరియు దేశ రాజధానిలోని కొన్ని ఇతర ప్రాంతాలలో భద్రతను కట్టుదిట్టం చేసినట్లు కేంద్ర హోమ్ శాఖా వెల్లడించింది.

కేంద్ర హోంమంత్రి అమిత్ షా మాట్లాడుతూ, తహవ్వూర్ రాణా తిరిగి రావడం మోడీ ప్రభుత్వ దౌత్యానికి గొప్ప విజయం అని అన్నారు. భారత ప్రజలతో అనుచితంగా ప్రవర్తించిన వారందరినీ తిరిగి తీసుకురావడం భారత ప్రభుత్వ బాధ్యత అని ఆయన అన్నారు. ఈ కేసును వాదించేందుకు పబ్లిక్ ప్రాసిక్యూటర్  నరేంద్ర కుమార్ మాన్ నియమిస్తూ కేంద్రం ఉత్తర్వులను ఇచ్చింది. 

 దేశంలోని జాతి వ్యతిరేక అంశాలపై కఠినమైన నిఘా ఉంచినట్లు హోంశాఖ సహాయ మంత్రి నిత్యానంద్ రాయ్ అన్నారు. విలేకరులతో మాట్లాడుతూ, ఉగ్రవాదం దేశం నుండి దాదాపు పూర్తిగా తుడిచిపెట్టుకుపోయిందని రాయ్ అన్నారు. గత 14 సంవత్సరాలుగా భారతదేశంలో అస్థిరతను సృష్టించడానికి ప్రయత్నించిన వారిపై బలమైన చర్యలు తీసుకున్నామని ఆయన పేర్కొన్నారు.