ఉచిత గ్యాస్‌ సిలిండర్‌ స్కీమ్‌.. ఏపీ ప్రభుత్వం కీలక ఉత్తర్వులు
DESK TEAMఅమరావతి ; ఉచిత గ్యాస్‌ సిలిండర్ల పథకానికి ఏపీ ప్రభుత్వం నిధులు విడుదల చేసింది. రేషన్‌ కార్డు దారులకు ఏడాదికి మూడు సిలిండర్లు ఉచితంగా ఇవ్వాలని ఏపీ ప్రభుత్వం ఇప్పటికే నిర్ణయించింది.
దీపావళి సందర్భంగా ఈ నెల 31 నుంచి ఉచిత గ్యాస్‌ సిలిండర్‌ పథకాన్ని ప్రారంభించాలని ఏపీ ప్రభుత్వం ఇప్పటికే నిర్ణయించింది. ఈ పథకంలో భాగంగా రేషన్‌కార్డు దారులకు ఏడాదికి మూడు సిలిండర్లు ఉచితంగా ఇవ్వనున్నారు. ఇందులో ఒక్క సిలిండర్‌ రాయితీకి సంబంధించిన రూ.895 కోట్లు విడుదల చేసేందుకు ప్రభుత్వం అనుమతినిచ్చింది. ఈ మేరకు పౌరసరఫరాల శాఖ ఎక్స్‌అఫిషియో కార్యదర్శి వీరపాండియన్‌ సోమవారం ఉత్తర్వులు జారీ చేశారు.
ఏపీ ప్రభుత్వం విడుదల చేసిన ఈ నిధులను గ్యాస్‌ కంపెనీలు, పౌరసరఫరాల శాఖ తెరిచిన అకౌంట్‌లో జమచేయనున్నారు. ఏడాదికి మూడు ఉచిత గ్యాస్‌ సిలిండర్లు ఇచ్చేందుకు రూ.2684 కోట్ల వ్యయం అవుతుందని ఇప్పటికే అధికారులు అంచనా వేశారు. ఈ రాయితీలకు సంబంధించి చెల్లింపుల కోసం ఇప్పటికే గ్యాస్‌ కంపెనీలు, పౌరసరఫరాల శాఖ సంయుక్తంగా ఒక అకౌంట్‌ను తెరిచింది. ఆ అకౌంట్‌లోనే ఇవాళ విడుదల చేసిన రూ.895 కోట్ల నిధులను జమ చేయనున్నారు. కాగా, ఈ రాయితీ డబ్బులను ముందుగా పట్టణాల్లోని వారికి చెల్లించిన తర్వాత గ్రామీణ ప్రాంతాల్లోని వారికి చెల్లించనున్నట్లు తెలుస్తోంది. గ్రామీణ ప్రాంతాల్లోని వారి అకౌంట్లలోకి 48 గంటల్లో రాయితీ డబ్బులు పడతాయని సమాచారం.