సూపర్ సిక్స్ హామీలు అమలు చేయాలంటూ,,,థాలీ బజావో కార్యక్రమంలో షర్మిల

అమరావతి, న్యూస్ వెలుగు; 2024 ఆంధ్రప్రదేశ్ ఎన్నికలకు ముందు వైసీపీ టార్గెట్‌గా విమర్శనాస్త్రాలు సంధించిన ఏపీ కాంగ్రెస్ చీఫ్ వైఎస్ షర్మిల.. ప్రస్తుతం టీడీపీ కూటమి ప్రభుత్వంపై ఫోకస్ పెట్టారు. ఎన్నికల సమయంలో ఇచ్చిన హామీలను ఎప్పుడు అమలు చేస్తారంటూ టీడీపీ కూటమి ప్రభుత్వాన్ని నిలదీస్తున్నారు. ఈ క్రమంలోనే బుధవారం వినూత్న కార్యక్రమం చేపట్టారు వైఎస్ షర్మిల. విజయవాడలో థాలీ బజావో పేరిట ప్లేట్లు, గరిటెలు మోగిస్తూ నిరసన వ్యక్తం చేశారు. టీడీపీ కూటమి ప్రభుత్వం, సీఎం చంద్రబాబు నాయుడు ఇకనైనా నిద్రలో నుంచి మేల్కొని.. ఎన్నికల సమయంలో ఇచ్చిన సూపర్ సిక్స్ హామీల అమలుపై దృష్టిపెట్టాలని డిమాండ్ చేశారు.

ఇది మంచి ప్రభుత్వమని ఊరూరా ప్రచారం చేసుకుంటున్న చంద్రబాబు.. ఇది ఎలా మంచి ప్రభుత్వం అవుతుందో సమాధానం చెప్పాలని వైఎస్ షర్మిల డిమాండ్ చేశారు. ఎన్నికలకు ముందు 20 లక్షల మందికి ఉపాధి అవకాశాలు కల్పిస్తామన్నారన్న షర్మిల.. ఆ దిశగా ఏం చర్యలు తీసుకుంటున్నారని ప్రశ్నించారు. అన్నదాత సుఖీభవ కింద ఇస్తామన్న రూ.20వేలు ఈ ఏడాది ఎగ్గొట్టే ప్రయత్నం చేస్తున్నారని మండిపడ్డారు. వరదల కారణంగా 7లక్షల ఎకరాల్లో పంట నష్టపోయిన రైతులకు ఇవ్వాల్సిన పరిహారంలో కోత పెట్టారని ఆరోపించారు. తల్లికి వందనం పథకం ఏమైందని.. మహాశక్తి పథకం కింద ఇచ్చే రూ.1500 ఎక్కడకు పోయాయని ప్రశ్నించారు.

ఎన్నికలకు ముందు చెప్పిన ఉచిత బస్సు పథకం ఎప్పుడు అమలు చేస్తారని ఏపీ ప్రభుత్వాన్ని వైఎస్ షర్మిల ప్రశ్నించారు. ప్రధాని మోదీకి ఏపీ అంటే ఎప్పుడూ చిన్నచూపేనన్న షర్మిల.. రాష్ట్రాన్ని మోసం చేసిన బీజేపీతో ఎందుకు కూటమి కట్టారో చంద్రబాబు సమాధానం చెప్పాలని డిమాండ్ చేశారు. వంద రోజుల పాలనలో ఏ పథకానికి ఎంత బడ్జెట్ కేటాయించారో చెప్పే ధైర్యం టీడీపీ కూటమి ప్రభుత్వానికి లేదన్న షర్మిల.. బాధ్యతలను విజయాలుగా చెప్పుకోవడం మానుకోవాలని హితవు పలికారు.

సూపర్ సిక్స్ హామీలను అమలు చేయకుండా నిధుల కొరత అని చెప్తున్నారన్న వైఎస్ షర్మిల.. రాష్ట్రానికి రూ.11 లక్షల కోట్లు అప్పులు ఉన్నాయని తెలిసీ ఎందుకు హామీలు ఇచ్చారని చంద్రబాబును ప్రశ్నించారు. హామీలు నమ్మి జనం ఓటేస్తే.. అమలు చేయని ప్రభుత్వం ఎలా మంచి ప్రభుత్వం అవుతుందంటూ షర్మిల నిలదీశారు. ఇది మంచి ప్రభుత్వం కాదని.. ముంచే ప్రభుత్వమని ఎద్దేవా చేశారు టీడీపీ కూటమి ప్రభుత్వం రోజురోజుకూ ప్రజల్లో విశ్వసనీయత కోల్పోతోందన్న షర్మిల.. సూపర్ సిక్స్ హామీలను ఎప్పటి నుంచి అమలు చేస్తారో శ్వేతపత్రం విడుదల చేయాలని డిమాండ్ చేశారు.