తుగ్గలి సాధన విద్యా నికేతన్ విద్యార్థులు జిల్లా స్థాయిలో ప్రతిభ

తుగ్గలి, ఆగస్టు 09 ( వెలుగు న్యూస్ ): డోన్‌లో ఆదివారం నిర్వహించిన జిల్లా స్థాయి రోప్‌ స్కిప్పింగ్‌ సెలక్షన్స్‌లో తుగ్గలి సాధన విద్యానికేతన్‌ ఇంగ్లీష్‌ మీడియం స్కూల్‌ విద్యార్థులు విశేష ప్రతిభ కనబరిచారు. పోటీల్లో పాఠశాలకు చెందిన 15 మంది విద్యార్థులు ఉత్సాహంగా పాల్గొని తమ ప్రతిభను చాటుకున్నారు. వీరిలో మొత్తం 9 మంది విద్యార్థులు రాష్ట్రస్థాయి పోటీలకు ఎంపిక కావడం విశేషంగా నిలిచింది. జిల్లా స్థాయి పోటీల్లో పాఠశాల విద్యార్థులు అద్భుత ప్రదర్శనతో పతకాలు సాధించారు. ఎంపికైన 9 మందిలో నలుగురు బంగారు పతకాలు, ముగ్గురు రజత పతకాలు, ఇద్దరు కాంస్య పతకాలు సాధించి పాఠశాలకు మంచి పేరు తీసుకొచ్చారు. విద్యార్థుల క్రమశిక్షణ, నిరంతర సాధన, పట్టుదల కారణంగానే ఈ విజయాన్ని సాధించగలిగారని పాఠశాల ఉపాధ్యాయులు తెలిపారు. రాష్ట్రస్థాయి పోటీలకు ఎంపికైన విద్యార్థులు ఈ నెల 23వ తేదీన రేణిగుంటలో నిర్వహించనున్న రాష్ట్రస్థాయి రోప్‌ స్కిప్పింగ్‌ పోటీల్లో పాల్గొననున్నారు. జిల్లా స్థాయిలో సాధించిన విజయాన్ని రాష్ట్రస్థాయిలోనూ కొనసాగించి పతకాలు సాధించాలని విద్యార్థుల తల్లిదండ్రులు, ఉపాధ్యాయులు ఆకాంక్షించారు. ఈ సందర్భంగా రాష్ట్రస్థాయి పోటీలకు ఎంపికైన విద్యార్థులను పాఠశాల కరస్పాండెంట్‌ దండు భాస్కర్‌ యాదవ్‌ అభినందించారు. విద్యార్థులు క్రీడలతో పాటు విద్యలోనూ రాణిస్తూ పాఠశాలకు, తల్లిదండ్రులకు, తుగ్గలి ప్రాంతానికి మంచి పేరు తీసుకురావాలని ఆకాంక్షించారు. విద్యార్థుల ప్రతిభను ప్రోత్సహించేందుకు పాఠశాల యాజమాన్యం ఎల్లప్పుడూ సహకరిస్తుందని తెలిపారు.