పత్తికొండలో ఘనంగా ప్రపంచ ఫోటోగ్రఫీ దినోత్సవం

​పత్తికొండ, న్యూస్ వెలుగు : “వంద మాటలు చెప్పలేని విషయాన్ని ఒక చిన్న ఫోటో స్పష్టంగా చెప్పగలదు” అంటారు. కాలం వేగంగా ముందుకు సాగిపోతున్నా, జీవితంలో మళ్ళీ తిరిగి రాని మధుర జ్ఞాపకాలను, క్షణాలను చిరస్థాయిగా నిలిపివేసే అద్భుతమైన

కళే ఫొటోగ్రఫీ. ఈ నేపథ్యాన్ని పురస్కరించుకొని పత్తికొండ పట్టణంలోని సాయిబాబా దేవాలయ ప్రాంగణంలో బుధవారం నాడు పత్తికొండ ఫోటోగ్రాఫర్స్ అసోసియేషన్ ఆధ్వర్యంలో ‘ప్రపంచ ఫోటోగ్రఫీ దినోత్సవం’ (వరల్డ్ ఫోటోగ్రఫీ డే) వేడుకలను అత్యంత వైభవంగా నిర్వహించారు. సంఘం అధ్యక్షుడు కాశీనాథ్ అధ్యక్షతన జరిగిన ఈ కార్యక్రమానికి ప్రముఖ ఆర్టిస్ట్ మోహన్ ముఖ్యఅతిథిగా హాజరయ్యారు. ​ఈ సందర్భంగా ఫోటోగ్రాఫర్లు ఒకరికొకరు శుభాకాంక్షలు తెలుపుకుంటూ సంతోషాన్ని పంచుకున్నారు. అనంతరం ముఖ్యఅతిథి మోహన్, అసోసియేషన్ ప్రతినిధులు మాట్లాడుతూ… 1839వ సంవత్సరంలో ఫ్రాన్స్‌కు చెందిన లూయిస్ డాగ్యురే ‘డాగ్యురియోటైప్’ అనే మొదటి వాణిజ్య ఫొటోగ్రఫీ ప్రక్రియను కనిపెట్టారని, ఆ సాంకేతికతను ఫ్రెంచ్ ప్రభుత్వం ప్రపంచానికి ఉచితంగా బహుమతిగా అందించిన రోజు జ్ఞాపకార్థంగా ప్రతి ఏటా ఆగస్టు 19న ఈ దినోత్సవాన్ని జరుపుకుంటున్నామని గుర్తుచేశారు. ఫోటోగ్రఫీ అనేది కేవలం వ్యాపారమో లేదా సరదానో మాత్రమే కాదని… అదొక కళ, సృజనాత్మకత, చరిత్ర అని కొనియాడారు.
​మారుతున్న కాలానికి అనుగుణంగా సాంకేతిక పరిజ్ఞానాన్ని పెంపొందించుకుంటూ ఫోటోగ్రఫీ రంగంలో సరికొత్త నైపుణ్యాలను అలవర్చుకోవాలని పిలుపునిచ్చారు. వృత్తిపరంగా ఎదురవుతున్న చిన్న చిన్న సమస్యలు, లోటుపాట్లను సభ్యులందరూ కలిసికట్టుగా సరిదిద్దుకుంటూ, ఐక్యతతో ముందుకు సాగాలని ఆకాంక్షించారు.
​ఈ కార్యక్రమంలో సీనియర్ ఫోటోగ్రాఫర్లు రాజు, వీరేష్, షఫీ, షేక్షా, జనార్ధన్, వీరాంజి, రమేష్, రామకృష్ణ, టోనీ, కర్ణ, లచ్చి, నూరు, అశోక్ తో పాటు స్థానిక కెమెరామెన్లు, అసోసియేషన్ సభ్యులు పెద్ద సంఖ్యలో పాల్గొన్నారు.